Komisioni i Prokurimit Publik ka pezulluar sërish ankandin për shitjen e klubit të futbollit Vllaznia. Reagimi i këtij komisioni ka ardhur pas ankesës së Almiro Gurakuqit dhe Capathia Albania shpk, për përjashtimin e tyre nga gara pa të drejtë.
Tanimë Komisioni ka kërkuar pezullimin e ankandit dhe paraqitjen e dokumetacionit nga Bashkia Shkodër brenda një afati pesë ditor. Përfaqësuesi Almiro Gurakuqi akuzon bashkinë për paracaktim të fituesit, ndërsa nga ana e saj Bashkia Shkodër do duhet të dorëzojë dokumentacionin e paraqitur nga ankuesi. Kështu, shitja e Vllaznisë shtyhet sërish.
Pas rishikimit të dokumenteve, do jetë Komisioni I Prokurimit që do vendosë nëse gara do nisë nga fillimi apo Almiro Gurakuqi do vijojë të jetë pjesë e procesit. Për klubin shkodran në fillim u paraqitën tre oferta të ndryshme, me Bashkinë Shkodër që përjashtoi dy kandidatë për mungesë dokumentacioni, duke lënë në garë vetëm Alban Xhaferin.
