Sekretari i Shtetit, Antony Blinken u vu në pozitë të vështirë ditën e hënë, gjatë një seance dëgjimore të Komisionit të Jashtëm të Kongresit Amerikan, kur u pyet mbi vendimin për përfshirjen e ish-kryeministrit Sali Berisha, dhe familjarëve të afërm të tij, në listën e zezë të Departamentit amerikan të Shtetit.
Blinken i orientoi anëtarët e Kongresit për te Byroja e Çështjeve Legjislative, kurse për median tha se ata mund të marrin përgjigje nga zëdhënësi i Departamentit të Shtetit.
Por gazeta e njohur amerikane, Washington Times ka përgënjeshtruar Sekretarin e Shtetit. Në një shkrim të radhës për këtë çështje, ata thonë se DASH nuk u ka dhënë informacion.
“Sidoqoftë, Departamenti i Shtetit nuk pranoi të jepte detaje për të mbështetur pretendimin kundër z. Berisha kur u pyet nga ‘The Times’ përpara botimit të artikullit të gazetës më 28 maj bazuar në intervistën me ish-kryeministrin shqiptar.
Një zëdhënës i departamentit tha në kushte anonimiteti se zotit Blinken i kërkohet të identifikojë çdo zyrtar dhe anëtarët e familjes së tij të ngushtë nëse departamenti merr informacion të besueshëm që pretendon korrupsion ose shkelje të të drejtave të njeriut,” shkruan gazeta.
Washington Times thekson se as miliarderi George Soros, që mendohet se qëndron pas këtij vendimi, nuk iu është përgjigjur pyetjeve të gazetës.
