Nga Boldnews.al
Nisma e Edi Ramës, për të hapur një televizion privat me paratë e shqiptarëve, për t’u bërë këtyre të fundit lavazh truri, po përhapet gjithandej në institucione shtetërore, qendrore apo lokale. Lali Eri e ka përvetësuar prej kohësh, duke krijuar një bandë prej 50 personash që merren me kronika të gatshme.
Ndërkohë, edhe ministrat bëjnë të njëjtën gjë, ato ecejaket e famshme të Ramës që po kopjohen nga Balluku, Çuçi, Xhaçka, Manastirliu, Klosi etj. Kështu po bëjnë edhe krerët e bashkive, ndërsa këtë nismë po e përqafon edhe Gramoz Ruçi. Kreu i Kuvendit, një njeri aspak televiziv, në pamje dhe në të folur, po krijon një GRTV! Por, sërish me lekët e popullit. Me këtë nismë Ruçi po largon gazetarët nga ambientet e Kuvendit, një nismë që ka sjellë me të drejtë një kundërshti të gazetarëve. Por, kjo i ka kushtuar Kuvendit, dhe neve që paguajmë taksa, plot 200 mijë euro.
Pak ditë më parë, disa gazetarë që mbulojnë Kuvendin, më përkatësisht ata që shkonin dhe ndiqnin komisionet, u ankuan publikisht se Kuvendi po i mbyll dyert. Do t’i lërë në një dhomëz dhe do të shohin televizor. Do të ndjekin virtualisht komisionet, ato që do t’u serviren. Por, gjithçka ka një kosto. Madje, në këtë rast të majme, pasi Parlamenti do të shpenzojë për këtë nismë pak më shumë se 200 mijë euro për pajisje elektronike. Ose, siç e quajnë edhe vetë; infrastruktura virtuale.
Ajo nga e cila do të mbrohen nga sytë dhe veshët kureshtarë të gazetarëve (ata pak që kanë ngelur). BoldNeës ka siguruar dokumentet e një tenderi që ka zhvilluar Kuvendi. Objekti i tenderit është “infrastruktura virtuale”. Fondi, kësaj here po e themi me të gjitha qindarkat, është 20.922.400 lekë. Ky fond do të përdoret për 60 ditë, ndërsa ajo që është më interesantja ështe se GRTV po harxhon të njëjta shuma si ERTV-ja apo EVTV-ja.
Në tender kanë marrë pjesë 2 firma, por njëra prej tyre nuk ka paraqitur ofertë. Më konkretisht, bashkimi i operatorëve S&T Albania dhe Albitak Canon kanë oferuar 20.610.000. Ose, e thënë ndryshe i kanë lënë 300 mijë lekë “bakshish” Kuvendit, pasi Infosoft Systems nuk ka paraqitur ofertë ekonomike. Mësohet se Kuvendi ka lidhur kontratën dhe menjëherë ka filluar nga puna, duke instaluar në Kuvend disa pajisje elektronike, që do të jenë për gazetarët virtuale.
