Mazhoranca ka edhe 5 ditë kohë për të shqyrtuar në komisionet parlamentare ligjin që lejon importin e plehrave. Nismëtari i ligjit, Eduard Shalsi, deklaroi dy javë më parë se ligji do të futet në komisione parlamentare për t’u diskutuar. Por deri tani asjnë komision nuk e ka marrë këtë ligj në dorë për ta shqyrtuar. Ligji ka mbetur peng i LSI, e cila, ndryshe nga hera e parë që votoi atë, ka paralajmëruar votën kundër.
Dekreti i presidentit do të duhet të shqyrtohet brenda të premtes. Me kalimin e afatit kushtetues për shqyrtim, atëherë ai mbetet në fuqi dhe ligji për importin e plehrave konsiderohet i rrëzuar.
PS nuk po e dëgon draftin e rishikuar në komisionet parlamentare pikërisht për të mos u përballur me kritikat e LSI. Burime pranë mazhorancës bëjnë të ditur për lapsi.al se Rama po tenton të bindë Metën për domosdoshmërinë e miratimit të ligjit.
Disa ditë më parë pranë kryesisë së kuvendit u ngritën në protestë shoqatat e ricikluesve. Në media kjo u komentua si një lëvizje e Edi Ramës për t’i bërë presion Metës. Ricikluesit janë reshtuar në krah të Ramës këtë herë duke organizuar protesta kundër kundështarëve të ligjit. Por për 3 vjet me radhë, që kur Rama e rrëzoi ligjin e importit të mbetjeve, ata e kanë pranuar vendimin në heshtje. Shoqëria Civile vazhdon ndërkohë të protestojë para parlamentit për t’u kërkuar deputetëve ta rrëzojnë ligjin.
Qeveria tentoi të fusë në lojë edhe Komisionin Europian. Ajo shpërndau një përgjigje të KE, sipas të cilës ligji është në përputhje me legjislacionin e BE. Shoqëria Civile, e drejtuar nga Aleanca Kundër Importit të Plehrave (AKIP) në protestën e saj nuk kërkon që ligji të rrëzohet pasi është në kundështim me ligjet e BE, por shpreh shqetësimin se me lejimin e importit, Shqipëria do të shndërrohet në vend për grumbullimin e plehrave të Europës.
Shoqëria Civile e ka bërë të qartë se nuk do të pranojë amendime të ligjit. Në Mbrostar, ku është parashikuar të ngrihet një impiant për djegien e mbetjeve, banorët janë ngritur në protesta. Në impiante të tillë ka dyshime se do të digjen edhe plehra të importuara nga Europa, edhe pse kryeministri thotë se do të importohen vetëm mbetje për riciklim.
Kur u miratua në parlament, ligji mori vetëm 63 vota të PS dhe një pjese të LSI. Kundër draftit të qeverisë janë reshtuar të gjitha partitë opozita dhe ato të koalicionit qeveritar, duke e lënë Edi Ramën të vetëm në mbrojtje të plehrave. /Lapsi.al
