Kryetar i Partisë Socialiste për Tiranën, Ervin Bushati ka dhënë një intervistë në lidhje direkte për Fax News, ku ka folur për Asamblenë e PS-së që u zhvillua një ditë më parë dhe Kongresin që pritet të zhvillohet në 12 qershor.
I pyetur nëse emrat e ministrave të mandatit të ardhshëm do të bëhen të ditur në këtë Kongres, Ervin Bushati tha se është shumë shpejt për të folur për emrat e ri.
Ndër të tjera, Ervin Bushati theksoi se Asambleja u mblodh si institucion ndërmjetës me Kongresin, në mënyrë që të vendosen dhe piketat për mandatin e ardhshëm.
Ftesën e Kryeministrit Edi Rama për bashkëpunim me opozitën, Ervin Bushati e quan tepër të sinqertë për shkak të rolit të rëndësishëm që opozita ka për vendin, sipas Bushatit.
Deputeti socialist thotë se votuesit e opozitës janë njësoj me socialistët dhe nuk meritojnë të trajtohen pa respekt, duke shtuar se ata meritojnë të përfaqësohen në parlament por edhe në jetën shoqerore e politike të vendit.
Intervista:
Asambleja e PS? Zgjedhësit shqiptarë kanë mandatuar me një mandat pune PS për më shumë transparence. Kemi filluar punën për të sjellë më të mirën për qytetarët shqiptarë. PS duhet të bëjë maksimumin. Në këtë kuadër Asambleja u mblodh si institucion ndërmjetës me Kongresin që është forumi më i lartë, jo vetëm për të festuar ditëlindjen e PS por dhe për të vendosur piketat kryesore kush do të jenë pikat e mandatit të tretë. Besimi në PS është në rritje, gjë të cilën ne duhet ta përkthejmë me më shumë përgjeshmëri ndaj qytetarëve.
Emrat e qeverisë së ardhshme në Kongresin e 12 qershorit? Mendoj që është pak herët, ndërkohë kemi detyra akoma me parlamentin. Mendoj se është herët për të folur për një qeverisje të re. Duhet një ekonomi e re e cila reagon. I kemi të gjitha mundësitë për të ecur para me integrimin. Është mundësi e artë për të shkuar shpejt dhe thellë drejt një zhvillimi ekonomik që meriton Shqipëria. Të gjitha këto kërkojnë punë të madhe. Çdo krizë është mundësi e artë për të riformatuar një ekonomi të re.
Bashkëpunim me opozitën? Ftesa jonë është shumë e sinqertë. Opozita ka një rol shumë të rëndësishëm për qytetarët që e kanë votuar dhe janë njësoj me ne dhe meritojnë respekt. Nuk duhet parë armiqësi. Meritojnë të përfaqësohen në parlament, por edhe në jeten shoqerore, ekonomike, të vendit. Dhe këtu luan një rol shumë të madh opozita, e cila është pjesa e pasme e lokomotivës. Me të vërtete nuk ka në dorë timon por ka një rol të rëndësishëm.
