Tre persona janë arrestuar mbrëmjen e djeshme nga policia e Durrësit pasi akuzoheshin se shisnin mina me telekomandë. Burime zyrtare bënë me dije këtë të Enjte se në kuadër të operacionit policor të koduar “Muzeu”, janë sekuestruar dhe tri mina me telekomandë që dyshohet e do shiteshin 2500 – 3000 euro copa.
Arrestimet
Në vendin e quajtur “Muzeu”, në lagjen nr.9 në Durrës, u bë kapja dhe arrestimi në flagrancë i: Ilir Alliu, 47 vjeç, Bledar Çakalli, 31 vjeç dhe Edmond Bardhi, 37 vjeç, të tre lindur në Dibër dhe banues në Sukth, Durrës.
Ata u kapën duke udhëtuar me një automjet tip “Volvo” me drejtues Alliun dhe pasagjerë Çakallin dhe Bardhin. Gjatë kontrollit të ushtruar në mjet nga policia, u gjetën dhe sekuestruan në cilësinë e provës materiale tri mina të montuara dhe të lidhura me telefon.
Hetimet
Sipas hetimeve paraprake, këta persona do të shisnin disa mina me telekomandë në qytetin e Durrësit, kundrejt shumës 2500-3000 euro copa.
Burime zyrtare konfirmuan se operacioni për arrestimin e personave të shpërmendur u krye nga efektivët për Hetimin e Krimit në Komisariatin e Policisë Durrës, në bashkëpunim me Sektorin e Trafiqeve të Paligjshme dhe te Krimeve Kundër Personit në DVP Durrës dhe erdhi në bazë të informacioneve të siguruara në rrugë operative se disa persona me tendencë kriminale në fushën e prodhimit dhe shitjes së minave me telekomande po tentonin të shisnin disa mina me telekomandë.
“Në bashkëpunim me Prokurorinë vijon puna për identifikimin dhe kapjen e personave të tjerë të përfshirë në këtë veprimtari kriminale, ndërkohë materialet i kaluan Prokurorisë së Rrethit Gjyqësor Durrës, për veprime të mëtejshme”, njoftoi policia.
