Kolegji Zgjedhor vendosi rrëzimin e kërkesës së PD për të marrë prova shtesë për shqyrtimin e pavlefshmërisë zgjedhore në Vlorë.
Këtë të Martë, kolegji po shqyrton kërkesën e Partisë Demokratike që kërkon shpalljen e pavlefshme të zgjedhjeve në qarkun e Vlorës.
Një ditë më parë, Kolegji Zgjedhor rrëzoi edhe kërkesën e Partisë Demokratike që kërkonte shpalljen e pavlefshme të zgjedhjeve në Gjirokastër.
Pas rrëzimit në Komisionin e Ankimeve dhe Sanksioneve të pretendimeve të partive të opozitës për shpalljen e pavlefshme të zgjedhjeve të 25 prillit, PD e LSI vendosën ta çojnë çështjen në Kolegjin Zgjedhor.
Partia Demokratike ka dërguar një dokument me 600 faqe shpjegime dhe 450 prova shkresore, foto dhe video. PD kërkon përsëritje të procesit zgjedhor në shumë qarqe, duke u shprehur se kishte fakte për blerje të votave.
