Nga Boldnews.al
Autoriteti Rrugor Shqiptar po mbyll skandalin e “Salillarit” në rrugën e Borshit me një tjetër tender të dyshimtë dhe pa garë.
Pasditen e kësaj të Premteje, institucioni i drejtuar nga Ergys Verdho ka shpallur rezultatet e procedurës për sistemimin emergjent të “Rrëshqitjes së Borshit”, me fond limit 136 milionë lekë të reja pa TVSh (rreth 1.3 mln euro me TVSh)
Sipas të dhënave zyrtare, fitues është kompania “Gener 2”, e cila ka paraqitur një ofertë shumë pranë fondit limit, me vlerë 134 milionë lekë të reja.
Por, nga dokumentat e tenderit konstatohet se procedura është kryer pa garë dhe në tender ka marrë pjesë vetëm kompania fituese, duke ngritur dyshime mbi të gjithë procedurën emergjente.
Autoriteti Rrugor Shqiptar e shpalli tenderin për rikonstruksionin e rrugës së Borshit në Prill 2021, pasi ky aks u dëmtua rëndë nga shirat e janarit të këtij viti.
Ngjarja u pasua me akuza të rënda publike për kompaninë “Salillari”, e cila e kishte në mirëmbajtje aksin kombëtar Vlorë-Sarandë, ku përfshihet edhe rruga e Borshit.
Në vitin 2017, kompania “Salillari” ka fituar një kontratë me vlerë 13 milionë euro për mirëmbajtjen e kësaj rruge, me një financim të Shtetit Shqiptar dhe Bankës Botërore.
Gjatë verës së vitit 2020, Autoriteti Rrugor Shqiptar, “Salillari”, por edhe eksponentë të lartë të maxhorancës reklamuan punimet që po kryente kompania private për rikonstruksionin e rrugëve të zonës së bregut jugor nga Jala në Himarë.
Por, kjo propagandë u rrëzua shumë shpejt nga shirat e fillim-vitit 2021. Disa orë reshje dhe gjysma e rrugës nacionale në Borsh u shemb tërësisht, duke e bërë atë të pakalueshme në pjesën më të madhe të saj.
Prej 5 muajsh, në atë aks rrugor nuk lejohet të kalojnë mjetet e tonazhit të rëndë, pasi rruga paraqet rrezikshmëri të lartë.
Pas incidentit skandaloz, asnjë prej institucioneve kompetente nuk morën masa ndëshkuese për kompaninë përgjegjëse të mirëmbajtjes, “Salillari” shpk.
Policia e Shtetit dhe Prokuroria e Vlorës nuk ndërmorën asnjë iniciativë hetimore për të zbuluar shkaqet dhe përgjegjësit e shembjes skandaloze të rrugës.
Ndërsa Autoriteti Rrugor Shqiptar, institucioni përgjegjës për mirëmbajtjen e rrugëve dhe kontraktori i “Salillarit” u mundua ta justifikonte kompaninë private pranë qeverisë, duke aluduar se problemi daton prej vitit të largët 2007.
Pa bërë asnjë verifikim mbi përgjegjësitë, Autoriteti Rrugor Shqiptar shpalli tenderin për sistemimin e dëmeve.
Por, edhe ky tender, ashtu si dëmtimi i rrugës, është i shoqëruar me dyshime, sidomos pas mungesës së garës dhe ofertës fituese, e cila është shumë pranë fondit limit.
