Rinovime për gardën e vjetër dhe Cristiano Ronaldo që nuk është më i pazëvendësueshëm. Juventusi i ri i Masimiliano Allegrit nis nga konfirmimi i futbollistëve me të cilët fitoi 5 tituj me radhë në Serinë A.
Pasi firmosi një kontratë prej 9 milionë eurosh në sezon, e cila e mban të lidhur në Torino deri në vitin 2025, tekniku livornez ka nisur ristrukturimin e skuadrës dhe puna e parë është mbyllja e rinovimeve për Chiellinin dhe Paolo Dybala.
Veteranit të mbrojtjes së Juventus, njëkohësisht kapiten, i përfundon kontrata më 30 qershor të kësaj vere, por Allegri i ka kërkuar presidentit Agnelli zgjatjen e saj edhe për një vit.
Një tjetër shtyllë e rëndësishme për ekipin konsiderohet edhe Paolo Dybala, një futbollist të cili Masimiliano Allegri i nxori më të mirën në vitet e qëndrimit në Torino, me argjentinasin që shënonte mesatarisht 20 gola në sezon.
Nëse këta dy lojtarë duken të destinuar të qëndrojnë, Cristiano Ronaldo mund të largohet. Allegri po studion një Juventus që nuk varet më nga portugezi dhe për këtë arsye drejtuesit bardhezinj po mendojnë shkëmbimin e tij me futbollist klasi nga Manchester United apo Paris Saint Germain, dy skuadra që kanë interes për 5 herë fituesin e Topit të Artë.
Zonja e Vjetër është gjithashtu pranë nënshkrimit me portierin e Milan, Donnarumma që ka vendosur përfundimisht largimin nga Milano, ndërsa nga rrjetet sociale, gardiani italian jep sinjale të vazhdueshme për një kalim në Torino.
