Drejtuesi i SPAK, Arben Kraja ka raportuar këtë të Premte para Këshillit të Lartë të Prokurorisë lidhur me bilancin e vitit 2020.
Kraja u ankua se gjatë vitit 2020 kanë punuar në kushte të vështira pasi godina ku ata u vendosën, ajo e ish-Krimeve të Rënda u rikosntruktua.
Kraja po ashtu tha se ka pasur probleme me fondin e pagave.
Drejtuesi i SPAK po ashtu shprehu pakënaqësi me numrin e prokurorëve që punojnë aktualisht në Prokurorinë e Posaçme. Kraja tha se nga 13 prokurorë aktualisht, SPAK duhet të ketë të paktën 20.
“Kemi filluar aktivitetin të vendosur në objektin e Prokurorisë për Krimet e Rënda. Ka qenë një sfidë e vërtetë për të gjithë stafin sepse ishim të detyruar të punojmë në kushte jo normale. Të gjithë oficerët ishin në një sallë të vetme. Problematika e projektit, sepse kishte shumë mangësi, sepse ishte bërë para se të krijohej institucioni. Por të gjitha këto u kaluan dhe në fund të vitit 2020 përfundoi rikonstruksioni. Kemi gjetur një buxhet që ishte miratuar pa u krijuar institucioni. Kemi pasur problematikë në realizimin e fondit të pagave. Nuk kishim numrin e duhur të prokurorëve. Fondi i pagave ka mbetur pak i palekujduar. Kemi paraqitur projektbuxhetin për vitin 2021”, tha Kraja.
Lidhur me ngritjen e qendrës së përgjimeve, ai tha se “problemi i parë që ndeshëm ishte se nuk ishte planifikuar nga pikëpamja e projektit. U përgatit dhoma e serverit dhe 5 salla. Të gjitha këto u realizuan deri në fund të vitit 2020. Pastaj periudha tjetër ishte ajo e kolaudimit. Pajisja sot është në punë”.
“Duke vlerësuar situatën ku jemi, vendosëm si prioritet ngritjen e një laboratori kriminalistike për ekspertimet dixhitale. Objektin e kishim, krijuam hapësirën e nevojshme. Kemi hapur garën dhe kemi marrë dy nga ekspertët më të mirë që janë në këtë fushë. Jemi në fazat e fundit të marrjes së programeve. Kemi shfrytëzuar mundësitë që na jepte ligji. Kemi marrë një fond nga komiteti i ngritur pranë Ministrisë së Brendshme. Një drejtim tjetër është aksesi në bazën e të dhënave elektronike. Do të kemi parasysh që aksesi nuk është diçka që realizohet brenda ditës, kërkon kohë dhe investim. Kemi punuar në këtë drejtim. Arritëm të bëjmë lidhjen e institucionit me fibra optike. Aktualisht kemi në dispozicion bazën e të dhënave, të gjendjes civile, gjyqësore, Kadastrën, po punojmë për të pasur akses në sistemin e Europol. Një drejtim tjetër që ka kushtuar kohë dhe energji ka qenë procedura e emërimit të drejtorit dhe hetuesve të BKH. Ka filluar më 10 janar dhe ka përfunduar më datën 30 korrik 2020. Për përzgjedhjen e drejtorit është ngritur një komision i përzgjedhjes i cili ka ndjekur të gjithë procedurën që ne e kemi raportuar. Në 8 shtator është hapur gara për hetuesit. Drejtuesi i BKH dhe unë kemi nxjerrë një urdhër ku kemi caktuar një komision,” deklaroi Kraja.
Ai përmendi edhe bashkëpunime që ka pasur SPAK me agjencitë e tjera ligjzbatuese në vend dhe të huaja.
