Në 4 muaj e parë të këtij viti, mbi 80 efektivë policie në të gjithë vendin janë arrestuar dhe proceduar për veprën penale të shpërdorimit të detyrës.
Numrin më të lartë të tyre e mban kryeqyteti, duke u pasuar nga Shkodra, Vlora, Elbasani dhe Durrësi. Aktualisht, ata vijojnë të jenë të pezulluar nga detyra deri në përfundim të hetimeve.
Kryesisht, efektivët e hetuar për këtë vepër penale janë të akuzuar si të përfshirë në trafikun e drogës, apo nuk kanë ushtruar kontroll të imtësishëm për sekuestrimin e parcekave me kanabis.
Ndërsa një tjetër kategori efektivësh po hetohen për ndihmën që u kanë dhënë autorëve për prerjen e paligjshme të pyjeve.
Në të njëjtën periudhë të vitit të kaluar, u arrestuan dhe proceduan 102 efektivë në të gjithë vendin vetëm për shpërdorim detyre.
Ndërsa gjatë 2020-ës numri i policëve të proceduar ishte 381.
Rasti më i fundit ishte pezullimi nga detyra i agjentit të antidrogës në Durrës, Edvin Sinanit.
Ai po hetohet si pjesë e një grupi që merret me shpërndarjen e drogës në doza të vogla në këtë qytet. /abcnews/
