Grupi për PD-në reagoi sot lidhur me përjashtimin nga gara për kreun e kësaj partie, Ibsen Elezi. Përmes një deklarate, grupimi kërkon rikthimin në garë të Elezit, ndërsa e konsideron si anti-statutor vendimin e Kryesisë së PD.
Gjithashtu, grupimi kërkon që në dispozicion të kandidatëve në garën për kreun e PD të të vihen listat e anëtarësisë, të cilët do të votojnë më 13 qershor.
Grupi për PD kërkon rishikimin e përbërjes së Komisionit Zgjedhor, ndërsa Lulzim Bashës i kërkohet të bëjë transparente burimet financiare dhe logjistike të fushatës së tij.
Gajët konferencës për mediat, Harxhi iu përgjigj pyetjes së gazetarëve, ndërsa theksoi se PD është marrë peng nga Lulzim Basha. Ajo nuk e cilësoi si të barabartë këtë garë, duke thënë se administrata punon vetëm për Lulzim Bashën.
“Nuk e mendoj asnjë moment tërheqje nga gara jemi futur pavarësisht vështirësive dhe pengesave. Disa herë e kam thënë që PD është marrë peng. Administrata punon vetëm për Lulzim Bashën. Grupi për PD do të vazhdojë të këmbëngulë. Do të vazhdojmë edhe pas datës 14 qershor,” tha Harxhi.
Nga ana tjetër, Bujar Nishani u shpreh gjithashtu i bindur se kauza e tyre ka si qëllim ringritjen e PD.
“Kemi si kauzë ringritjen dhe ndryshimit tërësor të PD që nis me konfigurimin e një lidershipi të ri. Është shumë e rëndësishme. Ndaj dhe tërheqja nuk ka sens,” tha Nishani.
