Bashkia e Tiranës ka njoftuar një procedurë prokurimi që ka në objekt të saj ”Mobilimin me pajisje dhe orendi të objekteve arsimore të dëmtuara nga tërmeti ” me një fond limit prej 7.5 milionë euro.
Vetë Bashkia nuk ka dhënë detaje mbi sasinë e mobileve dhe orendive që kërkohen por ka nënvizuar se kjo do të jetë pjesë e negocimit në momentin që do të kalohet faza e parë e shprehjes së interesit. Afati i lëvrimit në momentin që do të shpallet edhe fituesi do të jetë 2 muaj.
Sipas dokumenteve bizneset duhet të përmbushin një sërë kriteresh që nisin nga ato të përgjithshme me regjistrimin në QKR, nuk është në proces falimentimi, (statusi aktiv), nuk është dënuar për shkelje penale, në përputhje me Nenin 42 të Aktit Normativ, nuk është dënuar me vendim të gjykatës së formës së prerë, për vepra që lidhen me veprimtarinë profesionale dhe që ka paguar të gjitha detyrimet për pagimin e tatimeve e të kontributeve të sigurimeve shoqërore, sipas legjislacionit në fuqi.
Dëmet nga tërmeti në arsim
Në dokument nuk jepen specifikime lidhur me institucionet arsimore që do të plotësohen me mobilim por numri i atyre që u dëmtuan nga tërmeti në të gjithë vendin është i lartë. Sipas raportit që vlerësoi dëmet e tërmetit të 26 nëntorit 2019 efekti i fatkeqësisë në 11 bashki llogaritej rreth 985.1 milion euro apo 121.21 miliardë lekë nga të cilat 843 milionë euro 103.84 miliardë lekë përfaqësonte vlerën e aseteve fizike të shkatërruara dhe 141.2 milionë euro 17.37 miliardë lekë referuar humbjeve. Shumica e dëmeve u regjistruan në sektorin e Strehimit (78.5%) ndjekur nga sektori prodhues me 8.4 për qind dhe edukimi me 7.5 për qind.
“Arsimi: Dëmet u raportuan në 321 institucione arsimore në 11 komunat e prekura, duke përfaqësuar 24% të të gjitha institucioneve arsimore. Bashkitë e Tiranës dhe Durrësit kanë pjesën më të lartë të dëmeve, përkatësisht me 55% dhe 21%. Për më tepër, humbjet vlerësohen në 8.76 milion EUR (1.08 miliardë lekë)” thuhej në raport. /Monitor/
