Agron Shehaj, kandidati për kryetar i Partisë Demokratike, njoftoi se sot në orën 18:00 do të paraqesë platformën e tij në garën e brendshme në rradhët e demokratëve. Ndërkohë po sot, kreu demokrat Lulzim Basha, i cili në 13 qershor do të kërkojë mandatin e 3-të për drejtimin e PD-së pritet të nisë fushatën me një takim me demokratët e Beratit.
Kryetari i Degës së Partisë Demokratike në Berat, Gazment Azizi, ka lajmëruar përmes një postimi në rrjetin social, nisjen e fushatës së kryedemokratit Basha për t’u rikonfirumuar në kreun e PD-së.
Azizi bën me dije se takimi do të nisë sot në orën 18:00, në Pallatin e Kulturës ‘Margarita Tutulani’, ku do të marrin pjesë anëtarë dhe simpatizantë të PD-së në qarkun e Beratit.
“Të nderuar anëtar dhe simpatizantë të Partisë Demokratike,në kuadër të procesit për zgjedhjen e kryetarit të PDSH-së sot, ditën e henë,në orën 18:00 në Pallatin e Kulturës Margarita Tutulani do të zhvillohet një bashkëbisedim me z.Lulzim Basha”, shkruan kreu i degës së PD, Berat.
Në garën për postin e kryetarit të PD-së gjithashtu janë të përfshirë edhe Edith harxhi dhe Fatbardh Kadilli.
