Gjykata e Posaçme e Apelit refuzon kërkesën e Ardian Çapjes për lirim nga qelia. Çapja kërkoi zëvendësimin e masës “arrest me burg pa afat” në një masë më të butë me pretendimin se nuk ka prova për të mbështetur akuzat e ngritura ndaj tij.
Çapja u arrestua muajin e kaluar gjatë operacionit “Krasta 2021” dhe akuzohet për vrasjen e Gentian dhe Nezir Beqirit, krim i ndodhur në vitin 2012. Në kërkim për të njëjtën ngjarje është edhe Florenc Çapja. Të dy janë akuzuar nga prokuroria si porositës dhe organizator të vrasjes, që dyshohet se është pasojë e një vargu hakmarrjesh në Elbasan.
Hetimet për ngjarjen u rihapën në vitin 2018 nga disa të dhëna të mbërritura në Policinë e Shtetit, ndërsa prova më e fortë e Prokurorisë së Elbasanit është dëshmia e Ervis Bardhit, i konsideruar si ekzekutuesi fizik i Gentian Beqirit në apartamentin e tij. Bardhi, pasi u zbulua nga shenja e gishtit në targën e makinës së përdorur për vrasjen, zgjodhi të bashkëpunojë me drejtësinë duke treguar detaje.
Dëshmia e Bardhit u konsiderua e besueshme nga Prokuroria, teksa ai ka treguar me detaje mënyrën e vrasjes dhe se ka marr 50 mijë euro për ekzekutimin.
