Java e fundit e kampionatit do të jetë dhe vendimtarja për të përcaktuar fituesen e Kategorisë Superiore teksa më e avantazhuar në letër duket Teuta e cila do të luajë në shtëpi përballë Apolonisë të mërkurën e 26 majit.
Durrsakët mund të festojnë titullin në shtëpinë e tyre duke fituar ndaj Apolonisë e cila luan pa objektiva, por duhet pasur kujdes nga sfida Vllaznia-Laçi pasi fatet e kampionatit varen nga rezultati i kësaj ndeshje.
Shkodranët janë të detyruar të fitojnë ndaj kurbinasve dhe për të fituar titullin u duhet një triumf me goleadë, por Laçi do të luajë gjithçka deri në fund.
Partizani do të luajnë në transfertë përballë Bylisit e cila është në kërkim të mbijetesës, por të kuqtë e cilësojnë ende të hapur garën për kampionat dhe do të provojnë deri në fund.
Kukësi do të presë Kastriotin i cili është në kërkim të mbijetesës duke hedhur sytë nga sfida e ballshiotëve me Partizanin.
Në ndeshjen e fundit, Tirana pret Skënderbeun teksa të dyja skuadrat luajnë pa objektiv pasi korçarët arritën të siguronin qëndrimin në Superiore me fitoren 2-1 ndaj Kukësit.
Kategoria Superiore, java e fundit
E mërkurë 26 maj
Bylis-Partizani 17:00
Tirana-Skënderbeu 17:00
Kukësi-Kastrioti 17:00
Teuta-Apolonia 17:00
Vllaznia-Laçi 17:00
