Ish-Kryeministri Sali Berisha deklaroi pasditen e djeshme se do të padiste në një prej gjykatave franceze Sekretarin amerikan të Shtetit, Antony Blinken, lidhur me vendimin e DASH, që e shpallte liderin historik të demokratëve dhe familjarë të afërm të tij, si persona non-grata në Shtetet e Bashkuara.
Lidhur me deklaratat e Berishës për padinë ndaj Blinken, është pyetur sot ambasadorja amerikane Yuri Kim, e cila nuk ka preferuar të merret me paralajmërimet e ish-Kryeministrit, ndërsa ka vënë theksin se ditët e pandëshkueshmërisë duhet të marrin fund.
“Më falni, nuk e kam idenë për cfarë po flisni. Shqipëria është anëtare e NATOs, është aleate e SHBA-ve, shteti ligjor duhet të prevalojë, askush nuk mund të jetë mbi ligjin, kështu që ditët e pandëshkueshmërisë duhet të marrin fund. Ky është një projekt që ne së bashku mund ta bëjmë, kështu që le të vazhdojmë përpara”, tha ambasadorja.
Komentet e saj diplomatja amerikane i bëri nga baza e ‘Pashalimanit’ të Vlorës.
Yuri Kim tha se stërvitja që po mbahet në Shqipëri është më e madhja e organizuar në Ballkan dhe përveçse mundësive për t’u specializuar në fushën ushtarake, po sjell edhe mundësi të mëdha për zhvillim ekonomik pasi do të ketë edhe investime amerikane në vend.
“Sot jam këtu në Pasha Liman për të parë operacionet detare. Kjo është për të siguruar që kur ne bashkëpunojmë me njerëi tjetrin, janë dominues në ajër toke dhe në det.
Së bashku me investimet në mbrojtje kemi parë që ka zhvillime të mëdha të biznesit. Si ambasadore amerikane dua të shikoj më shumë investime në këtë vend sepse është i shkqlqyer. Kjo është dicka që duhet të punojmë së bashku, sepse unë kam pjesën tim dhe ju keni pjesën tuaj. Ju keni parë zhvillime domethënëse, në fushën e shtetit ligjor”, tha ajo.
