Gjykata e Shkallës së Parë në Shkodër ka dhënë masën e sigurisë “Arrest me burg” për 15-vjeçarin Ergys Malja, i dyshuar si bashkëpunëtor në vrasjen e shtetasit Endri Mustafa.
Në seancën për masën e sigurisë, 15-vjeçari nuk ka pranuar që të japë asnjë deklaratë përpara Gjykatës, ndryshe nga Policia, ku ai dha dëshminë e tij. Avokati mbrojtës, për shkak të moshës së tij, kërkoi një masë më lehtësuese, ndërsa prokurori Gëzim Spahiu kërkoi masën e sigurisë “Arrest me burg”, të cilën e dha Gjykata. Seanca për masën e sigurisë ka zgjatur pak minuta, ndërsa në mjediset e jashtme të Gjykatës kishte forca të shtuara sigurie.
Pas deklaratës së 15-vjeçarit, Policia e Shkodrës shpalli në kërkim shtetasin Ibrahim Lici, por babai i këtij të fundit ka mohuar se djali i tij është autor i kësaj vrasjeje dhe këtë sipas babait, e vërtetojnë kamerat e sigurisë, duke pretenduar se Ibrahim Lici natën e vrasjes ka qenë në një vend tjetër dhe se është i filmuar nga kamerat. Edhe bashkëshortja e Endri Mustafës, Ingrid Mustafa, deklaroi se Ibrahim Lici, sipas saj, nuk është autori i vrasjes dhe se kjo vrasje, sipas bashkëshortes, nuk ka lidhje as me fisin Bajri, ndërsa i bëri apel Policisë që ta zbardhë këtë ngjarje të rëndë.
I arrestuari i dytë
Gjykata e Shkallës së Parë në Shkodër ka dhënë masën e sigurisë “Arrest me burg” edhe për shtetasin Edison Arrazi.
Ky shtetas gjatë seancës për masën e sigurisë nuk është pyetur fare lidhur me vrasjen e shtetasit Endri Mustafa, por vetëm për sasinë e drogës, e llojit kanabis sativa, prej 200 gramësh, që u gjet në një ndërtesë të vjetër në zonën e “Zukth-Kashtave”, në Shkodër, larg banesës së tij. Fillimisht në njoftimin e Policisë thuhej se 26-vjeçari është arrestuar si person që ka dijeni për vrasjen, por në procesverbalin e Policisë të arrestimit të tij, e vetmja akuzë ndaj tij është ajo për sasinë e kanabisit prej 200 gramësh.
Për drogën Arrazi ka mohuar se ka lidhje për shkak se nuk është gjetur në banesën e tij, siç u tha herën e parë, por në një godinë të braktisur në “Zukth-Kashta” që është larg nga shtëpia e Edison Arrazit. Pavarësisht këtyre pretendimeve, Gjykata e Shkallës së Parë dha masën e sigurisë “Arrest me burg” për 26- vjeçarin.
Policia
Sipas Policisë, Ibrahim Lici është i dyshuar për veprën penale “Vrasje me paramendim e kryer në bashkëpunim”. “Më datë 17.05.2021, ora 19:00, u kap në flagrancë shtetasi Ergys Malja, i ditëlindjes 10.02.2006, banues në lagjen ‘Guerile’, Shkodër, me arsim 9 klasë.
Ky shtetas u arrestua në flagrancë për veprën penale ‘Vrasje me paramendim e kryer në bashkëpunim’, sepse në bashkëpunim me shtetasin Ibrahim Lici, i ditëlindjes 08.09.1993, banues në lagjen ‘Guerile’, Shkodër, me arsim 9 klasë, më datë 15.05.2021, rreth orës 21:30, në vendin e quajtur Livadhe, në lagjen ‘Guerile’, kanë vrarë me armë zjarri shtetasin Endri Mustafa, i ditëlindjes 30.06.1989, banues në lagjen ‘Guerile’, me arsim 12 klasë.
Ky shtetas, pas plagëve të marra nga arma e zjarrit tip pistoletë ‘Beretta’ me nr. PE12469, ka gjetur vdekjen në vend. Trupi i shtetasit Endri Mustafa është gjetur pas kërkimeve në datën 17.05.2021 në vendin e quajtur ‘Livadhe’ në Shkodër. Shtetasi Ibrahim Lici u shpall në kërkim për veprën penale të ‘Vrasjes me paramendim e kryer në bashkëpunim’ dhe ‘Mbajtja pa leje e armëve dhe municioneve luftarake’.
Në funksion të kësaj ngjarjeje është arrestuar në flagrancë shtetasi Edison Arrazi, i ditëlindjes 28.09.1995, banues në lagjen ‘Salo Halili’ në Shkodër, me arsim 9 klasë, sepse këtij shtetasi gjatë një kontrolli iu gjetën një sasi rreth 200 gramë lëndë narkotike hashash”, thuhet në raportin e Policisë së Shkodrës.
