Projekti i SuperLigës së Europës dështoi 48 orë pas krijimit dhe tani ende tre klube të mëdha si Real, Barça e Juve janë nën kërcënimin e UEFA-s për t’u ndëshkuar pasi ende nuk janë larguar zyrtarisht nga ky projekt. Edhe FIFA ka mbështetur Ceferin kundër 12 klubeve të mëdha por ja që situata ishte plotësisht ndryshe dhe zbulohet se pikërisht FIFA dhe Infantino ishin ata që kanë mbështetur që në fillim këtë projekt.
Zbulimi vjen nga gazeta prestigjoze “Neë York Times” që shkruan se presidenti i FIFA-s, Infantino ka qenë i informuar që nga fillimi për SuperLigën madje ka patur edhe bisedime me përfaqësues të 12 klubeve të mëdha ku ka dhënë “ok” e tij që sipas NYT do të merrte në këmbim pjesëmarrjen e këtyre ekipeve në projektin e ri të Botërorit të Klubeve.
“Infantino ishte në dijeni të planit. Ai e dinte se disa nga njerëzit e tij më të afërt ishin të angazhuar prej muajsh, të paktën deri në fund të janarit 2019, në negociatat për mbështetjen që Superliga do të merrte nga FIFA. Bisedimet, të cilat filluan në vitin 2019, u drejtuan nga një grup i njohur si A22, një konsorcium këshilltarësh të udhëhequr nga financierët spanjollë Anas Laghari dhe John Hahn, zbulon “Neë York Times”. Zyrtarët e A22 zhvilluan takime me disa nga bashkëpunëtorët më të ngushtë të Infantinos, përfshirë z.v.sekretarin e përgjithshëm të FIFA-s, Mattias Grafstrom. Në këto bisedime u ishin ofruar garanci klubeve dhe bankës amerikane të investimeve JP Morgan për të financuar projektin”, lexohet në artikullin e New York Times.
Për të bërë një lidhje të mundshme, mund të kujtojmë fjalët e Infantinos pas dështimit të projektit ku ai reagoi zyrtarisht dhe e quajti një ligë separatiste por nga ana tjetër kërkoi nga UEFA që të bëhej kujdes me penalizimet ndaj klubeve.
