Ish-kryeministri Sali Berisha deklaroi këtë të Enjte në emisionin “Opinion” se ka një “non sens” në deklaratën e DASH, që e shpalli atë “non grata” në SHBA.
Lidhur me pjesën e deklaratës së DASH, se Berisha ka pasuruar aleatët, ish-kryeministri tha se aleatët i pasuron një njeri që pasurohet për vetë.
“S’mund të kuptoj një njeri që pasuron aleatët dhe s’pasuron veten. Ajo që shkruhet të faktohet”, vijoi ai.
“Ka non sens aty, se unë s’kam asnjë dokument që Sali Berisha sot pas 30 viteve ka pasuri të shtuar. 34 m2 më shumë se ka pasur në diktatorë ka dhe ato kursime që ka deklaruar në ILDKPI dhe s’kam asnjë pasuri në Shqipëri po në botë dhe cilido që ta gjejë e ka të falur”, tha Berisha.
Lidhur me deklaratën e sotme të Palmer, Berisha tha se “do i kërkoja Palmer që të paraqesë provën më të vogël” për akuzat ndaj tij.
Ai deklaroi se akuzat e DASH janë “pa asnjë bazë”.
“S’ka pasur Sali Berisha akuzë për keqpërdorim të fondeve publike kurrë”, shtoi ai.
