Përleshje të ashpra kanë ndodhur midis anarkistëve dhe policisë greke në zonën Eksarkia të Athinës në 8-vjetorin e vrasjes së Aleksandros Grigoropulos.
Përleshjet filluan pasditen e të martës, kur protestuesit goditën me gurë forcat e policisë nga ana tjetër këta të fundit u kundërpërgjigjën gazit lotsjellës.
Situata u përshkallëzua në orët e mbrëmjes, kur anarkistët nisën të flaknin edhe bomba molotov, ndërsa u vunë zjarrin dhjetëra kazanëve të plehrave dhe gomave të makinave.
Në mbrëmje, qielli i qendrës së Athinës ishte i mbuluar nga një re e dendur tymi. Policia njoftoi se ka ndaluar 18 persona që janë shoqëruar për në mjediset e drejtorisë së përgjithshme të policisë greke.
Aleksandros Grigoropulos ishte vetëm 15 vjeç kur u qëllua për vdekje nga një patrullë policie mbrëmjen e 6 dhjetorit 2008. Menjëherë pas kësaj mijëra të rinj u grumbulluan në vendngjarje dhe protestuan për gjithë natën.
Për tri ditë rresht situata doli krejtësisht jashtë kontrollit të autoriteteve, ndërkohë që protestuesit shkaktuan zjarrvënie masive dhe shkatërruan qendra tregtare e banka, dhe grupe keqbërësish plaçkitën një numër të madh dyqanesh në qendër të Athinës.
