Nga Boldnews.al
Pas vrasjes së Everest Cakës në Elbasan, mbrëmjen e kësaj të Marte, kishte aludime se ai ishte një ndër personat e pyetur së fundmi nga përfaqësues të autoriteteve belge për një seri ngjarjesh kriminale që kanë ndodhur në Bruksel dhe në Shqipëri.
Prokuroria e Elbasanit e mohoi që viktima e atentatit më të fundit në Elbasan, 41-vjeçari Caka, të ishte pyetur nga prokurorët belgë.
“Boldnews.al” ka siguruar një dokument konfidencial, në të cilin rezulton se Everest Caka, djali i tezes së Arjan (Ardit) Spahiut, i vrarë në nëntor 2020 në lagjen Molenbek të Brukselit, nuk ka qenë i përfshirë në listën e personave që përbënin interes për autoritetet belge, të paktën deri në këtë moment.
Sipas të njëjtit dokument, përfaqësuesit e Policisë dhe Prokurorisë së Belgjikës mbërritën në vendin tonë në fillim të muajit Maj 2021 për të pyetur katër persona, si edhe për të shkëmbyer informacion me homologët e tyre shqiptarë për serinë e vrasjeve që kanë ndodhur dhe po vijojnë të ndodhin në Elbasan.
Në krye të listës së personave të pyetur, me qëllim zbardhjen e atentatit në Bruksel, është Sigi Isufi, e veja e Arjan (Ardit) Spahiut.
Pas saj, autoritetet belge kanë pyetur edhe Arben Isufin, vëllain e viktimës.
Në vijim, prokurorët belgë kanë marrë dëshminë edhe të Oltion Kenutit, kushëri i afërt me Arjan Spahiun.
Në fund, rezulton se është pyetur edhe Erjon Alibej, i cili aktualisht është në paraburgim, i arrestuar nën dyshimet se është porositësi i vrasjes së Emiljano Ramazanit dhe Regis Runajt, ngjarje e ndodhur në Korrik 2020.
Autoritetet shqiptare dhe ato belge dyshojnë se seriali i vrasjeve, i shtrirë në kohë, ka në qendër përplasjet e vazhdueshme për trafikun e lëndëve të forta narkotike.
Ngjarja që solli autoritetet belge në Shqipëria ka ndodhur në fund të nëntorit 2020 në kryeqytetin e Belgjikës.
Në 28 nëntor të vitit të kaluar, në një atentat tipik mafioz mbeti i vrarë Arjan (Ardi) Spahiu.
Ai u qëllua me armë zjarri sapo doli nga një lokal në zonën e Molenbek. 38 vjeçari ishte nën shoqërinë e mikut të tij, Florian Narazani.
Viktima, ka qenë i akuzuar 11 vjet më parë si organizator i vrasjes se Gëzim Alikajt, ngjarje e ndodhur në qytetin e Elbasanit, në afërsi të Urës së Zaranikës.
Sipas hetimeve të kohës, ky i fundit dyshohet se ka vrarë 13 vite më parë një të afërm të Arjan Spahiut, çka ka bërë që hetuesit belg të dyshojnë se, krimi ndaj 38 vjeçarit një vit më parë, lidhet pikërisht me këtë ngjarje.
