Ambasadori i OSBE-së në Shqipëri, Vincenzo Del Monaco, nga Elbasani i ka drejtuar një apel institucioneve të drejtësisë që të hetojnë krimet zgjedhore. Diplomati që kryeson zyrën e OSBE-së në Shqipëri tha se institucionet e drejtësisë duhet të bëjnë një hetim të shpejtë lidhur me akuzat e ngritura nga opozita për shit-blerje të votave.
“Mendoj se të gjithë e kemi lexuar raportin e ndërmjetëm të OSBE/ODIHR-it. Kur flasim për ankesat për procesin zgjedhor dhe ngjarjet kriminale që ndodhën gjatë procesit zgjedhor nuk më takon mua të gjykoj. Unë kam plotësisht besim tek autoritetet gjyqësore shqiptare”, u shpreh ai.
Diplomati foli edhe për përplasjen me armë zjarri mes militantëve të PS dhe PD ku mbeti i vrarë Pjerin Xhuvani.
“Siç ju kujtohet, ditën pas vrasjes në Elbasan, përpara zgjedhjeve, ne bëmë një deklaratë shumë të qartë dhe kemi besim te një hetim i shpejtë dhe se gjyqësori do të bëjë atë që duhet bërë. Kështu funksionon në demokraci”, tha kreu i Prezencës së OSBE.
