Lëkundjet e tërmetit që ra në Greqi dhe u ndje në jug të vendit, ka shkaktuar dëme materiale dhe në Bashkinë e Devollit.
Dëmet janë vënë re në fshatrat kufitarë, ndërsa banorët shprehen se janë tmerruar nga lëkundjet. Qytetarët vënë në dukje se ata ende nuk janë dëmshpërblyer për tërmetet e dy viteve të shkuara.
Tërmeti i shkallës 5.2 Rihter që goditi një natë më parë Greqinë dhe u ndje dhe në jug të Shqipërisë, ka shkaktuar dëme materiale në fshatrat e Devollit. Banorët tregojnë se janë tmerruar nga lëkundjet e fuqishme, duke përjetuar dhe një herë tërmetet e qershorit 2019 dhe nëntorit 2020.
Ndërkohë kryetari i Bashkisë Devoll, Eduart Duro është shprehur se menjëherë pas tërmetit, emergjencat kanë dalë në terren dhe lëkundjet kanë shkaktuar dëme të lehta në 4 shtëpi në Vidohovë dhe 1 në Ponçare.
Banorët shprehin shqetësimin se pavarësisht reagimit të emergjencave, ende nuk kanë marrë dëmshpërblim për dy tërmetet e kaluara.
Qytetarët shprehen se ata janë lënë gjithmonë në harresë nga bashkia, ndërsa apelojnë për rikonstruksionin e banesave të tyre.
