Pasagjeri i cili ishte në makinë me Bledar Birçaj, në momentet kur ky i fundit u qëllua për vdekje me armë zjarri, është efektiv policie. Burime bëjnë me dije se pasagjeri i cili i shpëtoi plumbave është punonjës i policisë së Vlorës.
Nga pamjet e një kamera sigurie, ai duket teksa largohet pasi autorët qëllojnë ndaj drejtuesit të automjetit tip BMW X5, Bledar Birçaj, 40-vjeç, pronari i një lokali në qytetin bregdetar, në zonën e “Lungomares”.
Dinamika
Krimi ndodhi ditën e djeshme në lagjen “Hajro Çakërri”. Teksa ishte nën drejtimin e automjetit, dy persona dalin nga një tjetër automjet dhe qëllojnë në drejtim të BMW-së Birçajt, që lëvizte me shpejtësi të ulët. Pas të shtënave, në kamerën e sigurisë duken autorët që largohen me të njëjtin mjet që shkuan në vendngjarje. Po ashtu, nga makina tip X5 largohet edhe efektivi i policisë.
Raportohet se edhe viktima ishte i armatosur në momentin kur ndodhi ngjarja. Sipas burimeve policore, 40-vjeçarit iu gjet në brez një pistoletë “Berata”.
Hetimet
Dyshimet e grupit hetimor janë se kemi të bëjmë me një atentat të mirëmenduar dhe se autorët janë vrasës me pagesë. Dyshimet janë se ngjarja mund të ketë lidhje me një hakmarrje të mundshme. Raportohet se Bledar Birçaj kishte tre javë që ishte kthyer nga Spanja.
Viktima me precedentë penalë
Viktima rezulton me precedentë penalë. Më herët, në vitin 2011, Bledar Birçaj është arrestuar pasi dyshohej për kryerjen e veprës penale të “Vrasjes me paramendim” e kryer në bashkëpunim mbetur në tentativë, “prodhimit dhe mbajtjes pa leje të armëve luftarake dhe municioneve”, si dhe “Shkatërrim prone”. Në 25 korrik 2011 prokuroria e Vlorës, ka vendosur pushimin e hetimeve për Bledar Birçajn, me argumentin se nuk i provonin akuzat. Për qëndrimin në burg për një periudhë 122 ditore Birçaj ka përfituar dëmshpërblim financiar prej 2 milion e 760 mijë lekë të vjetra.
