Një person i shpallur në kërkim për trafik narkotikësh është arrestuar nga policia e Shkodrës.
Policia njoftoi këtë të Martë se, shërbimet e Forcës së Posaçme “Shqiponjat”, në bazë të informacioneve të marra në rrugë operative bënë kapjen dhe ndalimin e shtetasit të shpallur në kërkim Mervis Hysaj, 32 vjeç, banues në Koplik, Malësi e Madhe.
Po ashtu, u bë arrestimi në flagrancë, për veprën penale ”Përkrahja e autorit të krimit”, i shtetasit F. M. 22 vjeç, banues në Kamicë, Malësi Madhe.
Shtetasit e lartpërmendur janë kapur nga shërbimet e Policisë, në lagjen “Qemal Stafa”, Shkodër, duke qarkulluar së bashku në një automjet.
Hysaj, në vitin 2018, së bashku me shtetasin E.H. (i arrestuar në 2019), në vendin e quajtur “Syri i Kripës”, në fshatin Vukpalaj, Malësi e Madhe, kanë tentuar të trafikonin nëpërmjet liqenit të Shkodrës, një sasi prej 93 kg bimë narkotike të llojit marijuanë.
Nga strukturat e Seksionit për Hetimin e Trafiqeve dhe Narkotikëve, për Hysajn u bë ekzekutimi i vendimit të datës 08.05.2018 të Gjykatës së Apelit Shkodër, e cila ka caktuar masën e sigurisë “Arrest në burg” për veprën penale “Trafikimi i narkotikëve”.
