Në fotografinë më poshtë janë protagonistët e ngjarjes së ndodhur orët e vona të mbrëmjes së djeshme në Tiranë.
Foto është marrë nga një kamera sigurie dhe tregon një moment para se të qëllohej 27-vjeçari Mehmet Qema, që sipas policisë, ndodhi rreth orës 23:15, në rrugën “5 Maj”.
Në pamje duket autori – Marjus Dema, 27 vjeç – në këmbë dhe me një pistoletë në dorë, armë të cilën dyshohet se e posedonte pa leje dhe me të cilën qëlloi Mehmet Qeman.
Ky i fundit ndodhet ulur në një tavolinë bari, bashkë me persona të tjerë.
Lidhur me ngjarjen, Marjus Dema është shpallur në kërkim si autor i dyshuar të vrasjes së 27-vjeçarit Mehmet Qema.
Gjithashtu, në kërkim janë shpallur edhe personat e tjerë të panishëm kur ndodhi krimi: Erlind Peka, 27 vjeç, Bralid Aga, 28 vjeç, Blerim Hoti, 23 vjeç, Frenkli Myftari, 29 vjeç dhe Xhuljano Koçi, 19 vjeç, për veprat penale “Moskallëzim krimi” dhe “Veprime që pengojnë zbulimin e së vërtetës”.
Dyshimet janë se vrasja mund të ketë ndodhur nga pakujdesia.
Viktima dhe autori dyshohet se ishin shokë dhe teksa ishin nën shoqërinë e personave të tjerë, dyshohet se arma e mbajtur nga Dema është shkrepur nga pakujdesia dhe për pasojë ka lënë të vdekur 27-vjeçarin Mehmet Qema.
