Një vrasje me armë zjarri ka ndodhur këtë të Hënë në Vlorë.
Viktima është 40-vjeçari Bledar Birçaj, pronari i një lokali në qytetin bregdetar, në zonën e “Lungomares”.
Ai është qëlluar me armë zjarri teksa ishte nën drejtimin e një automjeti tip “BMW X5”.
Ngjarja
“Në lagjen ‘Hajro Çakërri’, në rrethana ende të paqarta është qëlluar me armë zjarri në drejtim të automjetit tip ‘BMW’ me drejtues shtetasin B.B., rreth 40 vjeç, i cili si pasojë e plagëve të marra është transportuar në spitalin e Vlorës, ku dhe ka ndërruar jetë. Grupi hetimor nën drejtimin e Prokurorisë ndodhet në vendngjarje dhe po punon për zbardhjen e plotë të rrethanave të ngjarjes. Shërbimet e Policisë të D.V.P. Vlorë, të Komisariatit të Policisë Vlorë po krehin zonën si dhe janë ngritur pika kontrolli me qëllim kapjen e autorit”, njoftoi policia.
Burime policore thanë se dyshimet e para të grupit hetimor janë se kemi të bëjmë me një atentat të mirëmenduar. Dyshohet se viktimës i kanë prerë rrugës e më pas drejt makinës me të cilën lëvizte Birçaj është qëlluar me armë zjarri. Të shtënat kanë ardhur nga një tjetër automjet, që është larguar pas vrasjes.
Në makinën tip “BMW” dyshohet se ka qenë dhe një tjetër person, që sipas raportimeve, nuk ka marrë lëndime.
Dyshimet janë se ngjarja mund të ketë lidhje me një hakmarrje të mundshme.
Viktima me precedentë penalë
Viktima rezulton me precedentë penalë.
Më herët, në vitin 2011, Bledar Birçaj është arrestuar pasi dyshohej për kryerjen e veprës penale të “Vrasjes me paramendim” e kryer në bashkëpunim mbetur në tentativë, “prodhimit dhe mbajtjes pa leje të armëve luftarake dhe municioneve”, si dhe “Shkatërrim prone”.
Në 25 korrik 2011 prokuroria e Vlorës, ka vendosur pushimin e hetimeve për Bledar Birçajn, me argumentin se nuk i provonin akuzat.
Për qëndrimin në burg për një periudhë 122 ditore Birçaj ka përfituar dëmshpërblim fiannciar prej 2 milion e 760 mijë lekë të vjetra.
