Është ekzekutuar në një atentat mafioz biznesmeni i njohur grek, Dionysis Korfiatis. Ngjarja e rëndë ka ndodhur ditën e sotme, në ishullin Zakyntos, ku biznesmeni 54-vjeçar është qëlluar nga një person, teksa ishte futur në një zyrë kontabiliteti.
Breshëria e plumbave nga jashtë zyrës nuk i ka lënë atij asnjë mundësi shpëtimi, ndërsa mediat greke raportojnë për një person të plagosur gjatë atentatit, i cili është jashtë rrezikut për jetën në spital.
Pas atentatit, policia ka gjetur makinën e djegur disa kilometra jashtë qytetit dhe armën e krimit brenda saj. Raportohet se për ekzekutimin e biznesmenit është përdorur një kallashnikov.
Në qershorin e vitit të kaluar, atij i bënë atentat kur ishte bashkë me bashkëshorten Christina Kloutsinioti, e cila mbeti e vdekur. Më herët ajo kishte kandiduar për postin e kryebashkiakes së Zakynthosit.
