Nga Boldnews.al
Zgjedhjet kanë qenë fatsjellëse për “qirje” Dhimitraq Tolin, kryetarin e Bashkisë Dropull. Në datën 26 prill, një ditë pas zgjedhjeve, kur të gjithë ishin me sy e vesh nga rezultati i zgjedhjeve, Dhimitraqi ka firmosur një tender të majmë. Dhe, me një firmë, ai i ka hequr plot 250 mijë euro Buxhetit të Shtetit, pasi fituesi nuk kishte ofertën më të ulët.
BoldNews ka siguruar dokumentet e këtij tenderi, ndërsa “qirje” (zoti) Dhimitraqi ka vijuar normalisht punën. Duket se këto tendera do të jenë të “modës” gjatë kësaj kohe, pasi me këtë ritëm, do të pasurohen vetëm një grush njerëzish, kryesisht ata që qëndrojnë pas zyrtarëve.
Duke analizuar dokumentet, mësohet se tenderi është me objekt “rikonstruksion i rrjetit të brendshëm të ujësjellësit të Derviçianit, Sofratikës dhe Terihatit në Bashkinë Dropull. Të ardhurat nga ky tender janë të buxhetit të shtetit, pasi vetëm tani mazhoranca ka filluar të ashtuquajturën “reforma e ujit”. Mësohet se tenderi do të ketë një kohëzgjatje prej 6 muajsh nga data e lidhjes së kontratës. Në tender kanë marrë pjesë 3 firma, përkatësisht kompania “Agi Kons” që ka ofruar 96.352.152 lekë. Shoqëria “EVEREST” ka ofruar 119.552.909 lekë dhe kompania “KRONOS” me ofertë 119.025.532 lekë. Dy firmat e para janë s’kualifikuar, me arsyetimin se “nuk kanë dorëzuar dokumentacionin e rregullt sipas kërkesave”. Dhe, fitues është shpallur shoqëria “KRONOS”, megjithëse ka ofruar rreth 250 mijë euro më shumë se oferta më e ulët.
Pra, gjithçka ka ndodhur vetëm 1 ditë pas zgjedhjeve, në datën 26 prill 2021, ku e gjithë vëmendja e opinionit publik ka qenë te rezultati i zgjedhjeve. Dhe, socialistët/specialista kanë vijuar punën nën rrogoz, duke firmosur dhe dhënë shpërblime miliona euro. Duke u ndalur te tenderi, mësohet se do të ndërtohen dy rezervuare me kapacitet 200 m3 në fshatin Derviçan. Do të rregullohet rezervuari ekzistues dhe do të ndërtohet dhoma e komandimit. Gjithashtu edhe ndërtimi i rrjetit të shpërndarjes për të tria fshatrat, ndërsa synohet “furnizimi me ujë 24 orë me presion të mjaftueshëm, cilesi të ujit në përputhje me standartet Shqiptare dhe të Komunitetit Europian. Sipas Bashkisë Dropull, sistemi është projektuar për një afat kohor prej 25 vitesh.
