Kreu i Komitetit të Ndërmjetësimit për Bashkëjetesë Kombëtare, Ndrec Prenga është arrestuar nga policia pasi në këmbim të 300 eurove i ka dhënë një gruaje një vërtetim fakti me qëllim për të kërkuar azil në vendet e Bashkimit Evropian.
Në sajë të operacionit të koduar “Azilkërkuesi” është arrestuar edhe 65-vjeçarja Sabahet Manuka banuese në Tiranë. Mësohet se hetimet nga ana e specialistëve të Seksionit kundër Krimit Ekonomik dhe Financiar në Drejtorinë Vendore të Policisë Durrës dhe Prokurorisë së Rrethit kanë zgjatur 1 muaj, ku me metoda speciale, është provuar edhe aktiviteti i jashtëligjshëm i 64-vjeçarit Prenga.
Manuka u kap në flagrancë, në afërsi të Ish-Doganës në Tiranë duke i dhënë 300 € Ndrecës, në këmbim të një vërtetimi fakti që i ka dhënë ky i fundit, me qëllim për ta përdorur për të kërkuar azil në vendet e BE-së.
Në cilësinë e provës materiale Policia ka sekuestruar:
- një sasi parash, 300€;
- 1 vulë;
- 3 telefona celularë.
Sipas policisë, Ndrec Prenga është person me precedentë penalë të mëparshëm i dënuar për të njëjtën vepër penale.
Prokuroria e Rrethit Gjyqësor Durrës ka ngritur akuzat për “Korrupsioni pasiv në sektorin privat” dhe “Falsifikim i dokumenteve”, në ngarkim të Prengës si dhe “Korrupsion aktiv në sektorin privat” në ngarkim të Manukës.
(Boldnews)
