Anxhela Peristeri, e ftuar në “E Diell”, tregoi të gjithë rrugëtimin e saj për në Eurovizion, promovimin e këngës dhe sqaroi disa keqkuptime që kishin lindur këtë periudhë.
I pari ishte një lapsus gjatë intervistës në skype në anglisht që Anxhela po realizonte me portalin ndërkombëtar wiwibloggs. Teksa intervistohej, Anxhela nuk po e gjente fjalën në anglisht për mbylljen nga pandemia dhe bëri një gjest si sharrë i cili u komentua gjerë e gjatë nëpër portale në formë memesh dhe titujsh bombastikë.
“Si ka mundësi që në 30 minuta intervistë, portalet të fokusohen vetëm tek një detaj që unë s’po e kujtoja për momentin dhe ndaj e bëra me atë shenjë” – sqaron Anxhela.
“Ne nuk kemi shkuar në Eurovision për të treguar sa mirë dimë të flasim, por sa mirë dimë të këndojmë edhe pse në fakt flas 5 gjuhë të huaja” – tha ajo.
