Partizani dhe Esin Hakaj ia kanë parë “hajrin” njëri-tjetrit në këtë sezon. Transformimi i 24- vjeçarit në tetë muajt e fundit është një histori fati dhe suksesi, ku pa dyshim ndikim ka pasur edhe “kimia” e krijuar mes mbrojtësit shkodran dhe trajnerit Ilir Daja.
Pas mbylljes së sezonit të fundit Hakaj nuk shikonte të ardhme te “demat”, pasi ishte aktivizuar pak dhe ishte thuajse i ikur. Mbrojtësi asokohe u përfol se ishte shumë pranë kalimit tek Apolonia. Por, Partizani me merkaton e bllokuar dhe Lorenc Trashin të shitur në Kuvajt nuk kishte asnjë mbrojtës të majtë në organikë, kështu që me urgjencë drejtuesit nga halli thirrën Hakajn që të kthehej, ndonëse e kishin lënë të lirë. Paska qenë e shkruar për shkodranin që “rilindjen” ta përjetonte pikërisht aty ku nuk e kishin besuar. Nisur nga ajo që ka shfaqur ekipi deri tani, Hakaj është titullar i padiskutueshëm dhe është i vetmi lojtar që i ka luajtur të 30 ndeshjet në kampionat.
Përpos kësaj, nën drejtimin e trajnerit Daja, Esin Hakaj ka pësuar një rritje të dukshme, ku gradualisht po plotëson boshllëkun e krijuar nga largimi i Trashit. 24-vjeçari shkodran arrin që të shtyjë shumë në krahun e majtë dhe të marrë pjesë në manovrën sulmuese, kryesisht me vertikalizimet dhe shërbimet në zonë, që në disa raste kanë shërbyer si asiste për shokët. Gjithashtu, Hakaj ka arritur të shënojë edhe një supergol ndaj Kastriotit, por ka qenë i pafat duke shënuar një autogol. Nga paraqitja dhe transformimi pozitiv, i bie që Hakaj të jetë në listën e lojtarëve që drejtuesit kërkojnë ta kenë edhe në sezonin e ardhshëm./Panoramasport
