Në një reagim pas zgjedhjeve dhe pas publikimit të rezultateve të 25 prillit, dega e PD nr 5 në Tiranë, nuk ka kursyer mbështetjen për kreun demokrat, Lulzim Basha.
Ndërsa i japin mbështetje kryetarit demokrat Basha, demokratët e degës nr 5 shprehen se Shqipëria meritonte ndryshimin duke shtuar se “kjo është betejë për demokracinë”.
“Këto zgjedhje ishin një zhgënjim për të gjithë Shqiptarët, pasi u shkel çdo parim i demokracisë dhe u vodh e tjetërsua në forma të ndryshme dhe me mjete të ndryshme vota e njerëzve të ndershëm, të atyre që prisnin dhe shpresonin tek ndryshimi.
Ky lumë babëzie, vjedhjesh, blerjesh e dhune nën drejtimin e Edvin Rames, nuk vlejti për Degen tonë ku me punën, kontributin dhe vendosmerinë tonë tejkaluam çdo parashikim, çdo objektiv dhe arritëm të paimagjinueshmen , duke thyer bastionin e së majtës në zemër të Tiranës.
Ju përgëzoj dhe ju falenderoj të gjithë ju demokratë të ndershëm, kontributorë, komisionerë, vëzhgues, numërues, kryetarë e sekretarë Seksionesh, kryetarë e sekretarë Grupseksioni te Degës 5, që me punën dhe palodhshmërinë tuaj mundësuat një deputet më shumë.
Falenderojmë kryetarin Basha që me performancën, inteligjencën, programin dhe palodhshmërinë e tij na motivoi, udhëhoqi, e na dha besimin e duhur për të arritur këtë rezultat që do të mbahet mend gjatë në memorien e qytarëve të Tiranës”, thuhet në një reagim.
Në vijim theksohet se demokratët e degës 5 kanë vetëm një mision: mbështetje maksimale ndaj Lulzim Bashës për të çuar deri në fund çmontimin e bandave të pushtetit që vodhën e blenë votën e shqiptarëve.
