Kryetari i Partisë Demokratike Lulzim Basha gjatë takimit të tij me banorët e Kukësit, i ka premtuar se Rruga e Kombit duhet të jetë e lirë, duhet të jetë rruga që na bashkon dhe jo rruga që na izolon.
“Kukësi është në varfëri të plotë. Papunësia ka prekur çdo familje dhe rreth 6 mijë prej tyre jetojnë me ndihmë sociale. Pagesa që qeveria vendosi për Rrugën e Kombit do të dyfishojë çmimin e biletës të udhëtimit, do të rrisë koston e lëvizjes së mallrave, dhe do t’i izolojë kuksianët nga pjesa tjetër e vendit. Ju premtova kuksianëve se unë dhe Partia Demokratike nuk do të pranojmë që ata të paguajnë për Rrugën e Kombit. Rruga e Kombit duhet të jetë e lirë, duhet të jetë rruga që na bashkon dhe jo rruga që na izolon”, ka thënë Basha.
Kreu democrat ka nisur një tur takimesh në Kukës, Has dhe Tropojë. Fillimisht Basha është ndaluar në Kukës ku ka zhvilluar një takim dhe më pas ka shkuar në Has.
