Presidenti i sapo zgjedhur i SHBA-ve vazhdon me surpizat e tij duke sjell pakënaqësi te shtetet e tjera. Pas telefonatës befasuese dhe në shkelje të protokollit që Trump i bëri presidentes së Tajvanit, ka reaguar Kina me një notë proteste.
Ministri i Jashtëm i Kinës, Wang Yi, tha sot se ka lëshuar një notë proteste për “palët relevante” pasi që Presidenti i Zgjedhur Donald Trump, ka biseduar me presidenten e Tajvanit, Tsai Ingwen – vend që Kina e konsideron provincë të sajën dhe nuk ia njeh pavarësinë.
Shkelje protokolli dhe diçka që nuk ka ndodhur që nga viti 1979 mes SHBA dhe Tajvanit është cilësuar veprimi i fundit që ka bërë presidenti i sapozgjedhur Donald Trump. Ai ka folur direkt me Presidenten e Tajvanit, veprim që nuk kishte ndodhur që nga koha e ndërprerjes së marrëdhënieve zyrtare mes tyre.
Nga ekipi i Trump kanë thënë se Presidenti i zgjedhur dhe Tsai Ingwen kanë vënë në pah “marrëdhëniet e afërta, ekonomike, politike dhe ato të sigurisë mes vete”, në këtë telefonatë. Ministri i Punëve të Jashtme të Kinës, Wang Yi, e ka cilësuar këtë telefonatë si “një shaka për të ardhur keq”, nga Tajvani, shkruan BBC.
