Java e 31-të e Superiores e vë Partizanin përballë Apolonisë, ku të kuqtë janë pritës. Në dalim nga tri ndeshjet e fundit që janë organizuar nga “demat” në stadiumin “ Air Albania”, sfida me fierakët është zhvendosur për t’u luajtur në “Elbasan Arena”.
Shkak është bërë ruajtja e fushës së impiantit të ri për derbin e kryeqytetit, që sipas kalendarit do të luhet më 12 maj. Partizani-Apolonia ishte vendosur fillimisht nga federata që të luhej të dielën, në orën 16:00. Këtë javë përballen mes tyre dy nga katër rivalët e Partizanit për titull, Vllaznia-Teuta.
Kjo ndeshje është përcaktuar që të luhet të hënën në orën 18:00 në Shkodër. Në mënyrë që të mos influencojë ndeshja e tyre një ditë më parë, mësohet se drejtuesit e Partizanit i kanë bërë kërkesë FSHF-së që nëse është e mundur, ndeshja e tyre me Apoloninë të zhvendoset të hënën, në të njëjtën orë me sfidën tjetër, Vllaznia-Teuta.
Për të mos krijuar pakënaqësi, aq më shumë që kjo zhvendosje nuk prishte punë, federata ia ka plotësuar “qejfin” Partizanit.
