Një ekip drejt Champions-it dhe tri të tjerë në “UEFA Europa Conference League” (UECL). Ky është objektivi për skuadrat shqiptare, krahas fitimit të titullit kampion në vend dhe Kupës së Shqipërisë. Drejt Champions-it në turin e parë kualifikues shkon ekipi kampion dhe në Konferencë Ligë shkon fituesja e Kupës dhe vendi i dytë dhe i tretë i kampionatit.
Në rast se bëhet e pamundur për fituesen e Kupës ose nëse është njëherësh mes tri vendeve të para në kampionat, atëherë biletën e tretë në këtë kompeticion e merr vendi i katërt i kampionatit.
Po sa është shpërblimi për këtë turne? Sa përfitojnë ekipet shqiptare? Është mësuar se sa priten që të jenë shpërblimet për skuadrat shqiptare, më së paku në dy turet e para të këtij kompeticioni të ri për ekipet në Europë. Kaq sa është mësuar deri më tani, deri në momentin që do të zbulohet gjithçka rreth këtij turneu.
SHPËRBLIMET
Për analogji të shpejtë, në turin e parë dhe të dytë në Europa Ligë, ekipet shqiptare deri vjet kanë përfituar 240 + 260, pra 500 mijë euro. Këtë vit, pritet që për Konferencë Ligën, ekipet shqiptare të përfitojnë shpërblim me një sistem progresiv. Për turin e parë, shpërblimi do të jetë rreth 350 mijë euro. Të shpërndara në mënyrë të tillë që 100 mijë euro i merr ekipi si parapagesë për pjesëmarrjen dhe 250 mijë të tjera në momentin e eliminimit.
Pra, në krahasim me Europa Ligën e deritanishme ka 110 mijë euro shpërblim më tepër. Për turin e dytë, shpërblimi të jetë sërish 100 mijë euro për pjesëmarrjen në të dhe 350 mijë euro si shpërblim në momentin që eliminohet nga ky kompeticion. Në total, ekipi në këtë rast merr 200 mijë euro (për pjesëmarrjen në dy turet e para) dhe 350 mijë euro në momentin e eliminimit. Pra në total, 550 mijë euro, 50 mijë më tepër sesa një ekip shqiptar që ka luajtur dy ture në Europa Ligë deri vjet.
