Ky sezon i Kategorisë Superiore do të mbahet mend gjatë nga futbolldashësit shqiptarë. Si rrallëherë këtë edicion futbollistik janë 5 ekipe në garë për trofeun më të lakmuar në vend. Teuta, Partizani, Vllaznia, Laçi dhe Tirana po luftojnë për të arritur te titulli kampion.
Javë pas jave ka pasur ndryshim të renditjes, ndërsa shpesh kanë qenë edhe dy ekipe në vend të parë. Përmendim javën e 29-të të elitës, ku kishte dy skuadra në krye të klasifikimit. Vllaznia dhe Partizani ndanin vendin e parë me 53 pikë.
Po, nëse fundi i sezonit do të jetë në të tilla pozita, me të drejtë lind pyetja se cila skuadër e fiton titullin kampion. Rregullorja e kampionatit shqiptar e përcakton qartë se cili ekip do të arrijë te trofeu që vijon si më poshtë:
Nëse dy ose më shumë ekipe kanë grumbulluar të njëjtën sasi pikësh në përfundim të sezonit, renditja e tyre në tabelën e klasifikimit përcaktohet duke mbajtur në konsideratë kriteret si më poshtë:
- pikët e grumbulluara në ndeshjet e zhvilluara mes ekipeve përkatëse;
- diferenca e golave të shënuar dhe të pësuar në ndeshjet e zhvilluara mes ekipeve përkatëse;
- diferenca e golave të shënuar dhe të pësuar gjatë kampionatit për sezonin futbollistik 2020-2021;
- numri më i madh i golave të shënuar gjatë kampionatit;
- me short.
