Kryeministri Edi Rama kandidoi në zgjedhjet e 25 prillit në dy qarqe, Vlorë dhe Durrës, ku renditej i 8 në listën e kandidatëve socialistë.
Pas shpalljes së rezultatit, PS ka fituar 8 mandate në Vlorë dhe po kaq në Durrës, çka do të thotë se Kryeministri ka luksin të zgjedhë se deputet i kujt qarku do të jetë. Dhe nga zgjedhja e Ramës do të vendoset se kush nga kandidatet që ndodhen në listë do të marrë mandatin e deputetit.
Nëse Rama zgjedh të jetë deputet i Durrësit, atëherë automatikisht mandatin e tij në Vlorë, e merr kandidatja e renditur pas tij në listë, Teuta Ramaj, që ka grumbulluar 1738 vota preferenciale.
Nëse Rama preferon të mbetet ligjvënës në Vlorë, atëherë mandati i deputetes në Durrës i shkon kandidates nr.9 në të qark Ana Dhamo.
Teuta Ramaj është mësuese e gjuhës shqipe, ndërsa Ana Dhamo është Doktore Shkencash në profilin e Drejtë Publike.
Njëra prej kandidateve socialiste do jetë pjesë e Kuvendit, ndërsa zgjedhja i mbetet Ramës. Nëse i referohemi deklaratave të mëparshme se ai nuk e tradhëton Vlorën, atëherë duket se ai do të heqë dorë nga mandati në Durrës duke favorizuar Ana Dhamon.
