Enkelejd Alibeaj, drejtues politik i PD në Fier në zgjedhjet e 25 prillit, tha se gjatë procesit të fundit zgjedhor ka pasur shkelje të panumërta, përfshi edhe numurimin.
Përsa i përket njohjes së zgjedhjeve ai tha se kjo nuk ishte në dorën e partive politike, por këto të fundit kanë në dorë të denoncojnë rastet e shkeljes së kodit zgjedhor dhe të mbikëqyrin respektimin e votës së qytetarëve.
“Nuk është në dorën e asnjë lideri politik dhe asnjë partie, që rezultati i zgjedhjeve të jetë në shijen e tyre apo jo, një rezultat është i drejtë apo jo pasi ke parë nëse janë përdorur apo jo kriminelë në këto zgjedhje, janë përdorur asetet e shtetit në funksion të një partie, dhe kjo përcakton dhe qëndrimin që ne duhet të mbajmë. Ajo që po bëjmë ne është denoncimi i asaj që ka ndodhur në këti zgjedhje, po mbledhim ngado të gjitha dokumentet, pasi vota nuk është pronë e partive por e shqiptarëve”, tha Alibeaj.
Në intervistën për Faxnews, ai është pyetur edhe në lidhje me kërkesat për dorëheqjen e kreut të PD, Lulzim Basha.
Ai tha se kjo është Partia Demokratike dhe ka vend për zëra kundërshtues. Por shtoi se në këtë kohë fokusi duhet të jetë të jenë ballë regjimit dhe jo Bashës.
“E para kjo është PD, ka pasur ka dhe do të ketë gjithmonë, por për të qenë seriozë, impenjimi është beteja me regjimin.
Njeri nga aktet ishte ai i 25 prillit. Çështja e vetme që duhet të mobilizojmë ne në këtë momente është lufta kundër regjimit. Nuk i kuptoj fare këto veprime që veçse halleve personale nuk merren me regjimin por janë zëdhënës të tezës së Edi Ramës.
Është kuptuar që pengesa e vetme janë PD dhe Lulzim Basha.
Kushdo që mban ison e tij , i shërben Edi Ramës për të instaluar regjimin total”, tha Alibeaj.
