Spektakël dhe gola në gjysmëfinalet e para të Europa League, me Manchester United që mposhti Romën me rezultatin 6-2, kurse Villareal befasoi Arsenalin 2-1.
“Djajtë e Kuq” tashmë thuajse kanë siguruar biletën për në finale teksa kanë një avantazh prej 4 golash në ndeshjen e kthimit në Romë. United e nisi në sulm dhe shumë shpejt e zhbllokoi ndeshjen me anë të Bruno Fernandes, i cili mjeshtërisht kaloi portierin e Romës pas pasimit të Edinson Cavanit. “Djajtë e kuq” në festë, por që zgjati pak, pasi një prekje e topit me dorë nga Pogba u konsiderua e parregullt dhe u akordua penallti.
Pellegrini nuk gaboi dhe vendosi baraspeshën, ndërkohë që Edin Dzeko ia doli më pas të shënonte ehde golin që i dha avantazhin skuadrës italiane. Cavani në minutat shtesë iu afrua golit të barazimit, por nuk shënoi i vetëm me portierin.
Gjithsesi uruguaiani nuk fali tre minuta nga nisja e pjesës së dytë, kur shënoi golin e baraziit, ndërsa më pas realizoi edhe të epërsisë. 3-2 dhe më pas festa ishte e gjitha për United, pasi Bruno Fernandes me një penallti që do nxisë debate realizoi në portën e Romës golin e katërt.
Pesë minuta më pas, në të 75’, Paul Pogba, me një goditje me kokë e çoi topin në rrjetë dhe e shënoi emrin në listën e golashënuesve, pasi asistit të të zakonshmit Bruno Fernandes. Spektakli nuk kishte mbaruar, pasi Greenëood realizoi edhe golin e gjashtë dhe të fundit.
Në ndeshjen tjetër, Villareali, arriti të ndëshkonte skuadrën e Arsenalit në minutën e pestë me anë të Trigueros. Pa u bërë gjysmë ore lojë, Raul Albiol realizoi me kokë pas një krosi nga këndi dhe spanjollët shkuan në dhomat e zhveshjes të qetë.
Ceballos i komplikoi edhe më shumë gjërat për “Topçinjtë”, pasi u ndëshkua me kartonin e kuq (2 të verdhë) në minutën e 57-të, duke e lënë skuadrën e tij me një lojtar më pak. Gjithsesi Arsenali reagoi dhe fitoi një penallti, që u kthye në gol nga Pepe.
E para gjuajtje në portë e londinezëve, që deri në fund nuk ia dolën të shmangnin humbjen. Gjithsesi shanset për kualifikim janë të mira, për shkak të golit të shënuar në fushë kundërshtare.
