Kryeministri i Kosovës, Albin Kurti, është shprehur nga Brukseli se nuk do të marrë pjesë në takimin me Serbinë më 11 maj, i cili u paralajmërua nga përfaqësuesi i lartë i BE-së, Josep Borrell.
Shefi i ekzekutivit të Kosovë ka bërë të ditur se në Bruksel do të shkojë përsëri për ndonjë drekë pune, ku të pranishëm do jenë edhe liderët e tjerë të Ballkanit Perëndimor.
“Unë nuk marr pjesë në atë takim për të cilin nuk e kam konfirmuar paraprakisht pjesëmarrjen. Ajo çka mund të konfirmoj është se do të vij në Bruksel për ndonjë drekë ose darkë pune të konfirmuar nga Borrell ku bëjnë pjesë liderët e Ballkanit Perëndimor”, tha Kurti.
Ai thekson se dialogu me Serbinë duhet përgatitur mirë dhe me parime pasi për Kurtin Kosova nuk e ka komoditetin të ballafaqohet me “dështime të reja”.
“Vizita që e kemi këtu dy ditë është në kuadër të marrëdhënieve tona bilaterale, që na nevojiten edhe më shumë marrëdhëniet e tilla të forcuara dhe takimet e tilla të rajonit para se të fillojmë kapitullin e ri të dialogut që duhet të jetë i përgatitur mirë edhe me parime pasi nuk e kemi komoditetin për dështime të reja”, shprehet Kurti.
