Kreu i “AEBEOK”, Kujtim Gjuzi pretendon se Partia Demokratike dhe ajo Socialiste i kanë vjedhur një votë.
Ai ka nxjerrë numrin e votave në Krujë, ku aleancës së tij i kanë numëruar vetëm 3 vota. Pikërisht me këtë numër tek, Gjuzi është revoltuar duke llogaritur se dy kandidatët bashkë me zonjat e tyre duhet të kishin marrë në total 4 vota.
Mister mbetet se kush e ka marrë votën e “vjedhur”.
“Mashtrimi i radhës. Numëruesit politikë të ps + pd në Krujë nuk kanë lënë as 4 votat e dy kandidatëve vendas. Të paktën 2 + 2 = 4 o numëruesit e lb 7×7=42. Kandidatet bashkë me zonjat e tyre bëjnë 4 vota o hajna. Sa turp të vjedhësh e të grabisësh votën e qytetarëve krutanë dhe kur e bën dhondrri hajn është më zi se lumi i zezës në Fushë Krujë,”-shkruan Gjuzi.
Nëse vota nuk është vjedhur siç pretendon Gjuzi, ose një nga gratë e kandidatëve ka votuar kundër burrit, ose vetë kandidatët. Skenari tjetër është që vota ka dalë e pavlefshme.
