Trajneri i Partizanit, Ilir Daja ka folur ditën e sotme para mediave, në prag të ndeshjes me Partizanin, e cila është planifikuar të zhvillohet ditën e nesërme, duke filluar nga ora 16:00.
Tekniku kryeqytetas është shprehur se skuadra e tij shkon në këtë transfertë vetëm për fitore, duke thënë se duhet të bëjnë as më pak dhe as më shumë se ndeshja e Kupës, ku u eliminuan nga kurbinasit.
“ E dimë se është një transfertë e vështirë. Është një fushë e nxehtë brenda rregullores së futbollit. Nesër nuk duhet të bëjmë as më pak dhe as më shumë, se ndeshja e Kupës, ku në pjesën e madhe dominuam ndeshjen. Kjo është mënyra e vetme për të shkuar te fitorja. Duhet të jemi grup në të dyja fazat e lojës. Nuk mund t’ia kalojmë ngarkesën një reparti, pasi do ishte vetëvrasje. Duhet të jemi të bashkuar në mbrojtje dhe në sulm.
Siç kemi pasur në vështirësi, ashtu ka pasur edhe Laçit. Ata fituan më 30 dhjetor, në një datë që kurrë nuk është luajtur në kampionatin shqiptar. Ne kemi biseduar me ekipin dhe drejtuam lojën. Të mos humbin ekuilibrat në lojë. 3 fazat e para kanë qenë një maratonë për ne, për shkak të ngjeshjes së ndeshjeve. Këtë fazë e quajmë me stafeta. Shkojmë në Laç për të marrë fitoren, do djersisim për 3 pikët, por luajmë vetëm për fitore.
Ne kemi pasur vetëm një ngërç, me golat e shënuar jemi ekipi më i mirë. Ka qenë një shpërndarje e golave në lojtarë të ndryshëm. Na vjen mirë që edhe Junior po ecën, pavarësisht se nuk është në rolin e tij. Tani që i afrohemi fundit nuk duhet të ndryshojmë shumë nga ekipi fitues. Ka disa gjëra që më shqetësojnë, por nuk mund t’i them. Potenciali që ka grupi, duhet të na japë forcë. Të japin maksimumin për të arritur objektivat. Duhet të bëjmë atë që kemi bërë. Kemi qenë mirë edhe me lojë. Në disa ndeshje mund të jemi edhe më shumë cinikë. Në këtë moment pikët janë shumë të rëndësishme.“, tha Daja.
