Pas ngjarjes së rëndë, të ndodhur dy ditë para zgjedhjeve, Gjykata e Elbasanit ka dhënë masën arrest me burg për Arbër Paplekaj, autorin e vrasjes së Pjerin Xhuvanit në Elbasan. Ndërsa janë lënë të lirë nën masën e sigurisë “detyrim paraqitje” të gjithë të arrestuarit e tjere lidhur me ngjarjen.
Në seancën gjyqësore, në Elbasan, Paplekaj, shprehet se ndjehet i tronditur.
“Ndjehem i tronditur sepse një njëri ka mbetur i vrarë. Dhe nuk e di se cila është gjendja e familjes sime”.
Seanca gjyqësore ne Gjykatën e Elbasanit ndaj Arbër Paplekajt rifilloi pas ndërprerjes me kërkesë të avokatit të Paplekajt, i cili kërkoi më tepër kohë të njihet me disa të dhëna të reja.
Në makinën e Klemend Xhaferrit, i cili është shpallur në kërkim është gjetur një listë me emra dhe disa karta ID, ndërsa në makinën e Mehmet Grecës janë gjetur një sasi e madhe parash. Emiljano Prenga ndodhet i shtruar në spitalin ushtarak dhe nuk u paraqit në seancë. Ky i fundit dhe Nuredim Kasma kanë qenë të dënuar me parë. Prokuroria nuk ka sqaruar se kush qëlloi i pari.
Seanca për masën e sigurisë u zhvillua nën masa të rrepta sigurisë.
Autori i dyshuar i vrasjes së Pjerin Xhuvanit në Elbasan, Arbër Paplekaj pas krimit u vetëdorëzua te komandanti i forcave Renea.
Ngjarja e rëndë ku mbeti i vrarë ish-kryetar i LSI-së në Elbasan, ish-zyrtar dhe së fundmi simpatizant aktiv i Partisë Socialiste në degën e Elbasanit, tronditi qytetin në prag të zgjedhjeve parlamentare.
