“Euobserver”, gazeta online me bazë në Brukses, i ka kushtuar një artikull zgjedhjeve parlamentare që do të zhvillohen në dvendin tonë më 25 Prill.
“Euobserver” shkruan se këto zgjedhje shihen gjerësisht si më të rëndësishmet që nga fundi i komunizmit në 1990-ën dhe Brukseli do ta shikojë me kujdes këtë proces si një matje për hapjen e procesit të negociatave për pranimin në BE.
“Vlerësohet gjerësisht se një dështim i Shqipërisë për të ecur përpara në katër vitet e ardhshme në procesin e integrimit, rrezikon ta kthejë vendin në autoritarizëm të mëtejshëm”, shkruhet në artikull.
Më tej, shpalosen profilet e dy kandidatëve kryesorë për kryeministër, Edi Ramës dhe Lulzim Bashës.
Në artikull, evidentohen dhe problematikat e shumta që ka hasur vendi gjatë qeverisjes Rama.
“Euobserver” shkruan:
Ndërsa gjatë periudhës 2006-2011 Shipëria arriti qëllimin e saj për liberalizimin e vizave me BE dhe anëtarësimin në NATO, udhëtimi i saj drejt anëtarësimit në BE është ngrirë që nga viti 2012 – për shkak të një kombinimi të ‘lodhjes së zgjerimit’ në kryeqytetet e BE dhe mungesa e suksesit të dukshëm nga qeveria Rama në përmbushjen e kërkesave të anëtarësimit në BE.
Shqipëria shihet se ka një problem tipik me korrupsionin, renditur në vendin e 104-të (nga 180 vende) vitin e kaluar nga OJQ-ja anti-korrupsion “Transparency International”.
Vetë qeveria e Ramës ishte përballur me skandale të ndryshme gjatë tetë viteve të tij në detyrë. Transmetuesi Zëri i Amerikës dhe gazeta tabloide gjermane Bild botuan regjistrime audio të anëtarëve të qeverisë së tij të përfshirë në pastrim parash dhe biseda për blerje votash.
Dhe dy (nga katër) ministrat e brendshëm janë pushuar nga puna, ose kanë dhënë dorëheqjen, pas akuzave për lidhje me krimin e organizuar
Ndërkohë, edhe pse Shqipëria nuk ka treguar shumë interes për ndihmë nga Rusia ose Kina, Turqia ka ushtruar një farë ndikimi.
Rama e quajti veten një “mik” të presidentit Rexhep Tajip Erdogan – dhe aplikoi disa nga politikat e Turqisë mbi ligjin e medias, gazetarët, trajtimin e çështjeve të korrupsionit dhe të emëruarve juridikë.
Reporterët pa Kufij zbuluan se liria e shtypit u ul, në vitin 2020, dhe Shqipëria u rendit e 84-ta në botë – krahasuar me të 75-in në 2018.
Ekonomia ka qenë – për çdo qeveri shqiptare – thembra e Akilit. Shqipëria është një nga vendet më të varfra në Evropë, me një normë zyrtare papunësie prej 15 përqind dhe mes të rinjve rreth 30 përqind.
Rreth 360,000 shqiptarë – pothuajse 12 përqind e të gjithë popullsisë – kanë bërë një kërkesë për azil në një nga vendet anëtare të BE.
Midis 2016 dhe 2019, Shqipëria ishte vendi i tretë më i madh për njerëzit që kërkonin azil në BE, pas vetëm shteteve të shkatërruara nga lufta, Siria dhe Afganistani.
Varfëria vlerësohet të jetë rritur me një përqind, me 28,000 njerëz të sapo-klasifikuar si të varfër, me rreth 18 përqind të popullsisë që jetojnë me më pak se 1.90 $ [1.58 €] në ditë.
Për më tepër, kufizimet e Covid-19 e kanë goditur keq ekonominë, veçanërisht në dy burimet kryesore të të ardhurave: turizmin dhe remitancat.
