Kryeministri Edi Rama dhe analisti Artan Hoxha u përfshinë në debate lidhur me ngjarjen e ndodhur ditën e mërkurë në Elbasan ku u vra 1 peron dhe u plagosën 4 të tjerë.
“Strukturat e mbrojtjes së votave bllokuan ca banditë aty që do blinin vota”, tha analisti Hoxha në emisionin Opinion, ndërsa Rama i konsideroi struktura paramilitare të ngjashme me ato të Hitlerit.
“Kush janë këto kriminelë që ndalojnë qytetarët e pafajshëm? E dini ju se ai personi që u ndalua në Elbasan është keqtrajtuar dhe nuk ka lidhje fare me votat? Prokuroria ka një video të atij komandatit të paramilitarëve, e cila përputhet plotësisht me dëshminë e atij qytetarit të keqtrajtuar. U vra një person në Elbasan nga këto strukturat”, tha Rama.
Ndërkohë analisti Hoxha duke u ndalur te ngjarja tha “si ka mundësi që 15 punonjës policie, bashkë me dy nëndrejtorët, nuk parandaluan ngjarjen? Po ato dy demokratët e mbrojtjes së votave kush i plagosi?”.
“O Artan nuk mbaj mend ndonjëherë as të ndërhysh dhe mos më le të flas, as të pirë. Çfarë ke sot, ke pirë gjë?”, iu përgjigj Rama.
Kryeministri ndërkohë paralajmëroi se mund të braktiste emisionin, nëse nuk do të lejohej të fliste apo që të vendosej një rregull.
Pak ditë më parë Kryeministri u largua nga studio e emisionit “5 pyetje nga Babaramo”.
