Një dram e vërtet është kjo në famijen Kuçaj në Shkodër, pasi përveç varfërisë ekstreme në të cilën jeton situata për 5 pjestarët e kësaj familje është vështirësuar edhe më shumë. Njëra prej dhomave të shtëpisë është djegur nga flakët dhe i zoti i shtëpisë Rexhep Kuçaj tregon për problemet e shumta që ka.
“Ne jetojmë në kushte shumë të vështira. Tani na u dogj edhe shtëpia duke shtuar edhe më shumë hallet e panumërta të familjes tonë. Jemi në një vështirësi shumë të madhe tashmë”. Shkak i djegies së dhomës është bërë energjia elektrike tregon kryefamiljari.
“Djegia e dhomës ka ardhur nga energjia elektrike. Në shtëpi ka qenë nusja e djalit dhe nipi im i vogël. Sapo kanë parë flakët menjëherë kanë dalë jashtë dhe kanë shpëtuar për mrekulli. Kanë ardhur komshinjtë dhe më pas zjarrfikëset që kanë ndihmuar për të shuar zjarrin”.
Aktualisht familja Kuçaj në fshatin Shtoj i Ri në Shkodër ndodhet mes varfërisë ekstreme ndaj Rexhep Kuçaj bën apel për ndihmë nga të gjithë ata që kanë mundësi shkruan “panorama”.
“I bëj thirrje të gjithë atyre që kanë mundësi që të na ndihmojnë nëse munden sepse jetojmë si në mesjetë”. Në banesën e djegur jetojnë dy familje, Rexhep Kuçaj së bashku me bashkëshorten dhe vajzën si dhe djali i tij me bashkëshorten dhe një fëmijë 2 vjeç. Papunësia, varfëria ekstreme janë ulur këmbëkryq në këtë familje ndaj ndihma ndaj tyre është emergjente.
