Kreu demokrat Lulzim Basha u shpreh nga Tropoja, ku zhvilloi mitingun elektoral, se ndryshimi është i pandalshëm. Basha tha se sot nuk ka asnjë shqiptar, të majtë e të djathtë, që nuk kërkon ndryshimin, nga Saranda në Tropojë.
Basha tha se koha e Edi Ramës ka mbaruar dhe është koha për një qeveri të të gjithë shqiptarëve.
“Njeriu që për 8 vite dështoi, që varfëroi shqiptarët, që i humbi shpresën, po troket sërisht në derën tuaj, por sot nuk ka shqiptar që të pranojë edhe 4 vite të tjera si këto 8 vite që kaluam. Ndaj edhe pak ditë na ndan nga ndryshimi i madh, duke votuar nr 9”, tha Basha.
Kreu demokrat tha se korrupsioni qeveritar dhe i Edi Ramës sot ka lënë Tropojën pa investime, pa rrugë, ndonëse është një nga zonat me bukuri përrallore.
“Ata menduan se duke i lënë pa investime do të thyejnë shpirtin e pamposhtur të njerëzve të mrekullueshëm të Tropojës.
Unë, një nga vendimet e para që do të marr si Kryeministër është shpallja e Tropojës nënprefekturë, duke i kthyer shërbimet, ato shërbime që sot juve ju duhet të bëni me dhjetra kilometra për ti marrë”, tha Basha.
Ai theksoi se ndryshimi është në dorën e shqiptarëve, asgjë nuk e ndal dot më verdiktin tuaj. “Nëse duam të çelim një të ardhme të re për fëmijët tanë, më 25 prill votoni nr 9. Nëse duam të rihapim edhe njëherë rrugën drejt Europës, votoni nr 9, sepse kjo është rruga e përparimit, rruga e mirëqënies”, tha Basha.
Ai i drejtoi një apel çdo shqiptari që më 25 prill të dalin masivisht të votojnë dhe të mos kenë frikë askënd përveç Zotit.
“Ndryshimi është në dorën tuaj. A i ha më njeri mashtrimet e Edi Ramës? A ka njeri që mendon se pas 8 vitesh pushtet, më shumë se askush tjetër që nga koha e Enver Hoxhës, ky njeri të bëjë gjë në 4 vitet e tjera?”, tha Basha.
